mhada lottery application पुणे, पिंपरी-चिंचवड आणि पुणे महानगर प्रदेश विकास प्राधिकरणाच्या (PMRDA) हद्दीत स्वतःच्या हक्काचं घर घेण्याचं स्वप्न पाहणाऱ्यांसाठी म्हाडा एक मोठी संधी घेऊन आली आहे. पुणे गृहनिर्माण आणि क्षेत्रविकास मंडळाने (म्हाडा) नुकतीच तब्बल ६,१६८ घरांसाठी सोडत जाहीर केली आहे. ही सोडत केवळ पुणे जिल्ह्यापुरती मर्यादित नसून, त्यात सोलापूर, कोल्हापूर आणि सांगली जिल्ह्यातील घरांचाही समावेश आहे.
या वर्षीच्या सोडतीमध्ये म्हाडाने पारदर्शकता वाढवण्यासाठी काही महत्त्वाचे बदल केले आहेत. आता अर्जदारांना अर्ज करताना त्यांच्या जोडीदाराचे आधारकार्ड आणि पॅनकार्ड हे डिजिलॉकरवरून मिळवणे बंधनकारक आहे. त्यामुळे अर्जदारांनी डिजिलॉकरवर नोंदणी करणे अनिवार्य आहे.
उपलब्ध घरांचा तपशील:
तुम्ही कोणत्या भागात घर शोधत आहात, त्यानुसार घरांची संख्या खालीलप्रमाणे आहे:
- पुणे महापालिका: १,५३८ सदनिका
- पिंपरी-चिंचवड महापालिका: १,५३४ सदनिका
- PMRDA हद्द: १,११४ सदनिका
- ‘प्रथम येणाऱ्यास प्रथम प्राधान्य’ योजना: १,६८३ सदनिका
- म्हाडा PM-AAY (प्रधानमंत्री आवास योजना): २९९ सदनिका
- १५% आणि २०% योजनेतील घरे: ४,१८६ सदनिका
अर्ज कसा कराल?
म्हाडाच्या घरांसाठी अर्ज करण्याची प्रक्रिया पूर्णपणे ऑनलाइन आहे. अर्ज करण्यासाठी तुम्ही खालील वेबसाइट्सना भेट देऊ शकता:
- सर्वसाधारण सोडतीसाठी: https://housing.mhada.gov.in
- ‘प्रथम येणाऱ्यास प्रथम प्राधान्य’ योजनेसाठी: www.bookmayhome.mhada.gov.in किंवा lottery.mhada.gov.in
महत्त्वाच्या तारखा:
अर्ज भरण्यासाठी तुम्हाला पुरेसा वेळ दिला आहे. पण शेवटच्या क्षणाची वाट न पाहता लवकरात लवकर अर्ज करणे हिताचे ठरेल.
- ऑनलाइन अर्ज भरण्याची अंतिम मुदत: ३१ ऑक्टोबर
- अर्जाची तात्पुरती यादी जाहीर: ११ नोव्हेंबर
- आक्षेप आणि हरकती दाखल करण्याची मुदत: १३ नोव्हेंबर
- अंतिम यादी जाहीर: १७ नोव्हेंबर
- सोडत: २१ नोव्हेंबर
तुम्ही सर्व आवश्यक कागदपत्रे तयार ठेवा आणि वेळेत अर्ज करा.
